ختم نبوتقادیانیوں سے قصدا نکاح کا حکم - (اعلی حضرت امام احمد رضا خان قادری)
استفتاء:
کیافرماتے ہیں علمائے دین ومفتیانِ شرع متین اس مسئلہ میں کہ زید نے باجود اس علم کے کہ مرزائی دائرہ اسلام سے خارج ہیں اور ان کے کافر ملحد ہونے کا فتوی تمام علمائے اسلام دے چکے ہیں، پھر بھی اپنی لڑکی کا نکاح ایک مرزائی کے لڑکے کے ساتھ کردیا اب زید کو گمراہ اور بدعقیدہ سمجھاجائے یا نہیں اور زید کے ساتھ کھانا پینا اور اسکی شادی غمی میں شریک ہونا اپنے یہاں اس کو شریک کرنا جائز ہے یانہیں اور جو لوگ ایسا کریں ان کے لئے کیا حکم ہے؟
از بدایوں مرسلہ نتھو ونثار احمد سوداگران چرم 18 ربیع الآخر شریف 1336ھ
الجواب:
اگر وہ لڑکا اپنے باپ کے مذہب پر تھا اور اسے یہ معلوم تھا کہ اس کا یہ مذہب ہے اور دانستہ لڑکی اس کے نکاح میں دی تویہ لڑکی کو زنا کے لئے پیش کرنا اور پر لے سرے کی دیوثی ہے ، ایسا شخص فاسق ہے اور اس کے پاس بیٹھنا تک منع ہے،
قال اﷲ تعالیٰ واماینسینک الشیطٰن فلا تقعد بعد الذكري مع القوم الظٰلمین 1
اﷲ تعالیٰ نے فرمایا: اور جو کہیں تجھے شیطان بھلا دے تو یاد آنے پر ظالموں کے پاس نہ بیٹھ۔ (ت)
ورنہ اس کے سخت بے احتیاط اور دین میں بے پروا ہونے میں کوئی شبہہ نہیں، اور اگر ثابت ہو کہ وہ واقعی مرزائیوں کو مسلمان جانتا ہے اس بنا پر تقریب کی تو خود کافر مرتد ہے، علمائے کرام حرمین شریفین نے قادیانی کی نسبت بالاتفاق فرمایا کہ:
من شك فی عذابه وكفره فقد كفر2
جو اس کے کافر ہونے میں شک کرے وہ بھی کافر۔
اس صورت میں فرض قطعی ہے کہ تمام مسلمان موت حیات کے سب علاقے اس سے قطع کر دیں، بیمار پڑے پوچھنے کو جانا حرام، مر جائے تو اس کے جنازے پر جانا حرام، اسے مسلمان کے گورستان میں دفن کرنا حرام، اسکی قبر پر جانا حرام،قال اﷲ تعالیٰ
ولاتصل علٰی احد منھم مات ابدًا ولاتقم علٰی قبرہ۔ 3
اﷲ تعالیٰ نے فرمایا: اور ان میں سے کسی کی میت پر کبھی نماز نہ پڑھنا اور نہ اس کی قبر پر کھڑے ہونا۔ (ت)
(فتاوی رضویہ،ج:14،ص:320تا322،رضا فاؤنڈیشن لاہور)
