مجاہد جلیل حضرت خواجہ محمد ضیاء الدین
حالات زندگی:
شیخ طریقت، مجاہد جلیل حضرت خواجہ محمد ضیاء الدین ابن حضرت خواجہ محمد الدین ابن حضرت خواجہ شمس العارفین سیالوی (قدست اسرارہم) ۱۳۰۴ / 1886-7ء میں سیال شریف (ضلع سرگودھا) میں پیدا ہوئے "منظور حق" (۱۳۰۴ھ) مادہ تاریخ ہے۔ آپ کو بچپن ہی سے علوم دینیہ کا بے حد شوق تھا۔ قرآن پاک حفظ کرنے کے بعد ممتاز افاضل سے علم دین کی تعلیم حاصل کی اور والد ماجد کے وصال کے بعد سجادہ نشین ہوئے۔ آپ نہ صرف قرآن کریم کے حافظ تھے بلکہ بائیبل پر بھی مکمل عبور رکھتے تھے۔ مطالعہ کتب سے اس قدر لگاؤ تھا کہ اکثر وبیشتر شام کا کھانا رات کے دو تین بجے تناول فرماتے تھے۔ ملک اور بیرون ملک سے کتب دینیہ کا بہت بڑا ذخیرہ منگوا کر کتب خانہ میں خاصی توسیع کی۔ آستانہ عالیہ پر قائم شدہ دار العلوم کو خاطر خواہ ترقی دی۔ علامہ زمان مولانا معین الدین اجمیری اور ان کے جلیل القدر شاگرد امان اللہ، مولانا محمد حسین اور دیگر اجلہ فضلاء کو آپ ہی کی کشش سیال شریف کھینچ لائی تھی۔ علم دوستی کی اس سے بہتر اور کیا مثال ہو سکتی ہے کہ آپ نے اپنے فرزند ارجمند شیخ الاسلام والمسلمین حضرت خواجہ محمد قمر الدین مدظلہ العالی کو تحصیل علم کے لیے اجمیر شریف مولانا محی الدین اجمیری کی خدمت میں بھیجا تھا۔ حضرت شیخ الاسلام کا کمال علمی اور علوم دینیہ سے لگاؤ آپ ہی کا مرہون نظر ہے۔
آپ کے دل میں ملت اسلامیہ کا بے پناہ درد اور مکار فرنگی سے حد درجہ تنفر تھا۔ آپ نے تمام عمر انگریز کو زمین کا لگان نہ دیا۔ ملت مسلمہ کی اس خیر خواہی اور انگریز دشمنی کے تحت آپ نے تحریک "ترک موالات" کی حمایت کی۔ آپ نے نہ صرف خود انگریز کی مخالفت میں حصہ لیا بلکہ دیگر مشائخ کو بھی اس مخالفت میں حصہ لینے کی طرف رغبت دلائی۔ آپ نے دربار رسالت ﷺ میں منظوم استغاثہ پیش کیا جس کے ایک ایک مصرعے سے درد اور کرب کا اظہار ہوتا ہے۔ چند اشعار ملاحظہ ہوں:
آپ کی امت سا دنیا میں نہیں کوئی ذلیل ایں سزائے آں کہ اوشد بیخبر زام الکتاب
قوم مسلم وہن کی علت میں ہے اب مبتلا اسقنا كاساً شفاء من لدنك یا سحاب
عقل مسلم کی ہوئی گم، اس کا سر ایسا پھرا نیک را بد می شمار کج را داند صواب
رحم کر ہمی پر جو ہے تو رحمۃ للعالمین چہرۂ پر نور تاباں را نمائی بے نقاب
اے خدا بخش دے ہم کو ضیاء شمس دیں سرخرو باشیم وشاداں پیش تو یوم الحساب
ایک مرتبہ انگریز کمشنر حاضر ہو کر ۳۵ مربع اراضی کی لنگر کیلئے پیش کش کی لیکن آپ نے یہ کہہ کر اس کی پیش کش کو ٹھکرا دیا کہ:
"اگر انگریز اپنی تمام حکومت بھی مجھے دیدے تو بھی میرا ایمان نہیں خرید سکتا۔ فقیر شاہی خزانے کا مالک ہے یہاں کسی چیز کی کمی نہیں ہے۔"
عنقاء شکار کس نشود دام باز چسیں کانجا ہمیشہ یا وبدست است دام را
تحریک خلاف کے سلسلے میں جب گرفتاریاں شروع ہوئیں تو ضلع سرگودھا کے قریب ۱۵۶ افراد گرفتار کئے گئے جن میں سیال شریف کے دار العلوم کے صدر مدرس مولانا محمد حسین اور دیگر علماء بھی تھے۔ حضرت خواجہ محمد ضیاء الدین قدس سرہ کے وارنٹ گرفتاری بھی جاری ہوئے لیکن ٹوانہ قوم کے رؤساء نواب بخش اور خدا بخش وغیرہم نے انگریز کمشنر کو واشگاف الفاظ میں متنبہ کیا کہ اگر حضرت کی طرف بری نگاہ سے دیکھا گیا تو ان سے پہلے ہم جیل میں جائیں گے اور گورنمنٹ کے مخالف ہو جائیں گے۔ چنانچہ حالات کے خطرناک تیور دیکھ کر آپ کو گرفتار کرنے کی جرات نہ کر سکے۔ آپ نے سون سیکسر کے پہاڑی علاقے سے وہ پتھر اکھیڑ کر پھینک دیا جس پر ترکوں کے خلاف داد شجاعت دینے والے فوجیوں کے نام کندہ تھے۔ آپ نے فرمایا:
"ہم ان بدبختوں کے نام دیکھنا نہیں چاہتے جنہوں نے عربوں پر گولیاں چلائی تھیں۔"
آپ نے رد مرزائیت میں ایک رسالہ "معیار مسیح" تحریر کیا جو ۱۳۲۹ھ میں چھپا۔ حضرت پیر مہر علی شاہ گولڑوی کے آپ کے ساتھ بڑے والہانہ تعلقات تھے۔ عید کے موقع پر آپ کے نام ایک خط میں لکھتے ہیں:
عید شد ہر کس زیارے عید یئے دار ہوس عيد ما وعیدئی ما دیدن روئے تو بس
عید مردم دیدن مہ، عید ما دیدار تو این چنیں عیدے نہ بیند در دو عالم سیکس
۱۳ محرم الحرام، ۲۲ جون (1348ھ/ 1929ء) کو آپ کا وصال ہوا اور آپ سیال شریف میں اپنے جد امجد حضرت خواجہ شمس العارفین سیالوی قدس سرہ کے پہلو میں محو استراحت ہوئے۔ مولائے کریم! قوم کو ان سے بیش از بیش مستفیض ہونے کی توفیق عطا فرما۔